Samarqandlik tadbirkor ustozlar bayramida o‘z o‘qituvchisiga ikki xonali uy sovg‘a qildi

Ijtimoiy tarmoqlarda samarqandlik tadbirkor 1-oktabr — O‘qituvchi va murabbiylar kuni munosabati bilan o‘z o‘qituvchisiga ikki xonali uy sovg‘a qilgani aks etgan video tarqaldi.

Maktabgacha va maktab taʼlimi vaziri Hilola Umarova ushbu videoni Telegram kanaliga joylab, bundan juda xursand bo‘lganini bildirgan.

“Ustozlarni eʼzozlash anʼanaga aylanayotgani rost bo‘lsin! O‘z o‘rnida, biz ham saxovatli yurtdoshimizga minnatdorlik bildirishni niyat qildik”, — deb yozadi vazir.

Videoda o‘qituvchi “Ustoz oldida o‘quvchisining mana bunday ishlari juda ham katta baxt”, — deya hayajonini yashira olmagan.

Avvalroq prezident Shavkat Mirziyoyev O‘qituvchi va murabbiylar kuni munosabati bilan bir guruh xodimlarni mukofotlagani xabar qilingandi.