O‘zbekistonda mahalliy yo‘nalishdagi poyezd chiptalari narxi 50 foizga, “Afrosiyob”niki esa 100 foizga oshiriladi
O‘zbekistonda mahalliy yo‘nalishda qatnaydigan yo‘lovchi poyezdlari chiptalari narxi oshiriladi. Bu haqda “O‘ztemiryo‘lyo‘lovchi” matbuot xizmati xabar berdi.
Qayd etilishicha, yo‘lovchi poyezdlar chipta narxlari so‘nggi marta 2018-yilda mahalliy yo‘nalishlarda, 2019-yilda yuqori tezlikda harakatlanuvchi “Afrosiyob” elektropoyezdida qayta ko‘rib chiqilgan bo‘lib, oxirgi 4-5 yil mobaynida tariflar o‘zgarishsiz qolib kelmoqda.
2019—2022-yillar va 2023-yilning to‘qqiz oyi davomida respublikada ish haqi miqdori 2,4 barobarga, elektroenergiya va yoqilg‘i narxlarining, logistika va transport xarajatlarining sezilarli darajada oshgani, shuningdek, yo‘lovchi vagon parklarini yangilash, yangi poyezdlarni xarid qilish, temiryo‘l vokzallarini zamon talablariga mos ravishda saqlashni hisobga olgan holda chiptalar narxiga o‘zgartirishlar kiritilmoqda.
“Shu munosabat bilan ‘O‘zbekiston temir yo‘llari’ AJ yo‘lovchi tashish xo‘jaligidagi yo‘lovchi chiptalarni 2023-yilning 20-oktyabr sanasidan mahalliy yo‘nalishlardagi yo‘lovchi poyezdlari chipta narxlarining tarif qismi 50 foizga, yuqori tezlikda harakatlanuvchi “Afrosiyob” elektropoyezdlari chiptalari to‘liq narxining 100 foizga oshirilishini maʼlum qiladi”, — deyiladi xabarda.
Sentyabr oxirlarida prezident Shavkat Mirziyoyev huzurida temir yo‘l sohasida hal qilinishi lozim bo‘lgan asosiy masalalar yuzasidan yig‘ilish o‘tkazilgandi. O‘shanda “O‘zbekiston temir yo‘llari” xoldingga aylantirilishi, shuningdek, “O‘zbekiston temir yo‘llari”ning nosohaviy aktivlarini sotish vazifasi qo‘yilgani to‘g‘risida xabar berilgandi.
