Pentagonda Ukrainaga yordam berish uchun 5,2 milliard dollar qoldi — The Wall Street Journal
Pentagonda Ukrainaga harbiy yordam ko‘rsatish uchun 5,2 milliard dollar mablag‘ bor, hozirgi xarajatlar darajasida bu yana olti oyga yetadi. Bu haqda Amerika harbiy departamentining ismi oshkor etilmagan vakillariga tayanib, The Wall Street Journal nashri xabar berdi.
Mablag‘lar urush boshlanganidan beri Qo‘shma Shtatlar Ukrainaga yuborgan 43,9 milliard dollarlik xavfsizlik yordamining taxminan 12 foizini tashkil qiladi.
The Wall Street Journal ta’kidlashicha, AQSH Ukraina armiyasini modernizatsiya qilish va uning NATO bilan muvofiqligini oshirish bo‘yicha uzoq muddatli dastur uchun foydalangan hisob-raqamda hozir pul qolmagan.
Bundan tashqari, Ukrainaga ko‘rsatilgan yordamdan so‘ng, AQSH qurol zaxirasini to‘ldirish uchun ajratiladigan mablag‘lar miqdori taxminan 1,6 milliard dollarga kamaydi. Rasmiylarga ko‘ra, bu Pentagon ehtiyojlari uchun yetarli emas.
