Sirdaryoda 400 dollarga IIBdagi tanishlari orqali “prava” olib berishni va’da qilgan shaxs ushlandi
Qoraqalpog‘iston Respublikasi va Sirdaryo viloyatida pul evaziga haydovchilik guvohnomasini olib berishni vaʼda qilgan shaxslar qo‘lga olindi, deb xabar beradi Bosh prokuratura huzuridagi departament.
Qayd etilishicha, departamentning Mirzaobod tuman bo‘limi tomonidan IIV xodimlari bilan hamkorlikda tezkor tadbir o‘tkazilgan. Tadbirda D.T. ismli shaxs fuqaro A.S.ga go‘yoki IIBda ishlovchi tanishlari orqali hech qanday o‘quv mashg‘ulotlariga qatnashmasdan “B”, “C” toifadagi haydovchilik guvohnomasini olib berishi evaziga 400 dollar va 400 ming so‘mni olgan vaqtida ashyoviy dalillar bilan ushlangan.
Shu kabi, departament hamda DXXning Amudaryo tumani bo‘limlari tomonidan o‘tkazilgan tezkor tadbirda “A.P.” MCHJ avtomaktabi instruktori O.X. fuqaro SH.U.ni haydovchilik guvohnomasini olish uchun bo‘lib o‘tadigan imtihondan tanishlari yordamida o‘tkazib qo‘yishi evaziga 400 dollarni olgan vaqtida ashyoviy dalillar bilan ushlangan.
Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
Bundan oldin Toshkent viloyatida soxta sertifikat evaziga haydovchilik guvohnomasi olgan fuqaroga sud hukmi o‘qilgandi. Unga Jinoyat kodeksining 59-moddasiga asosan tayinlangan jazolarni qisman qo‘shish yo‘li bilan uzil-kesil o‘tash uchun ish haqining 20 foizini davlat daromadi hisobiga ushlab qolgan holda 2,5 yil muddatga axloq tuzatish ishlari jazosi tayinlangan. May o‘rtalarida bo‘lsa, Farg‘onada 200 dollarga “prava” olib berishni va’da qilgan avtomaktab rahbari ushlangandi.
