Qozog‘iston zilziladan jabr ko‘rgan Afg‘onistonga qutqaruvchilar va gumanitar yordam yubordi (foto, video)
10-oktyabr kuni Afg‘onistonga 45 nafar qozog‘istonlik qutqaruvchi jo‘natildi, deb xabar bermoqda Qozog‘iston Favqulodda vaziyatlar vazirligi. FVVning bir guruh kuch va vositalari Qosim-Jo‘mart To‘qayev topshirig‘i bilan falokat hududiga yuborilgan.
“Hirot viloyatiga yetib kelgan zahoti, tun bo‘lishiga qaramay, qozoq qutqaruvchilari qidiruv-qutqaruv ishlarini boshladi. Ular uchun ish maydoni sifatida Hirot shahridan 25-30 km uzoqlikda joylashgan Naibrofi hududida belgilanadi. Shunisi e’tiborga loyiqki, rasmiylar ushbu hududni eng qiyin deb atagan. Aynan shu yerda bedarak yo‘qolganlar soni ko‘p”, — deyiladi Qozog‘iston FVV xabarida.
Hirot rahbariyati “samaradorlik uchun minnatdorlik bildirgan va kecha-yu kunduz ishlashga shay qutqaruvchilarning ruhidan hayratda qolgan”.
Bundan tashqari, bugun, 11-oktyabr kuni Qozog‘ison Afg‘onistonga gumanitar yukning birinchi qismini yubordi. To‘qayev topshirig‘iga muvofiq Qozog‘iston tomonidan moddiy yordam ham ko‘rsatilmoqda.
“Davlat moddiy zaxirasidan oziq-ovqat, chodir, kiyim-kechak, ko‘rpa-to‘shaklar ajratildi. Hammasi bo‘lib jo‘natilayotgan gumanitar yuklar ro‘yxatida 1 659 tonna yuk bor”, — deya maʼlum qildi Qozog‘iston FVV.
Shuningdek, SK Pharmacy Afg‘onistonga dori-darmonlar ajratgan. Dori-darmon va chodirlar Qozog‘iston Milliy gvardiyasi samolyoti orqali jo‘natildi. Afg‘oniston tomoni ularni bugun ularni qabul qiladi. Gumanitar yordamning qolgan qismi temiryo‘l orqali yetkaziladi.
