Rasman: Islom Maxachev Oliveyraga emas, Volkanovskiga qarshi oktagonga ko‘tariladi 

Yengil vazn toifasida UFC chempioni Islom Maxachev 21-oktabr kuni Abu-Dabida bo‘lib o‘tadigan UFC 294 musobaqasida oktagonga ko‘tariladi.

Maxachev ushbu musobaqada Charlz Oliveyraga qarshi revansh jangi o‘tkazishi lozim edi. Biroq, Oliveyra jarohat sabab, turnirda ishtirok etmaydigan bo‘ldi. Uning o‘rnini Aleksandr Volkanovski egallaydi.

ESPN bu almashinuvni tasdiqladi. 

Charlz Oliveyra mashg‘ulotlar vaqtida jarohatlangan. Uning qoshi yorilib ketgan. Oliveyra muxlislardan uzr so‘radi. 

Eslatib o‘tamiz, Maxachev va Volkanovski UFC 284 da o‘zaro to‘qnash kelgandi va Islom hakamlar qaroriga ko‘ra g‘alaba qozongan edi.