Andijonda pul evaziga ishga kiritib qo‘yishni va’da qilgan tez yordam dispetcheri va iqtisodchisi ushlandi
Andijon viloyatida ishga joylashtirib qo‘yishni vaʼda qilgan dispetcher va iqtisodchi ushlandi, deb xabar beradi Bosh prokuratura huzuridagi departament.
Ma’lum qilinishicha, departament hamda DXXning Andijon viloyat boshqarmasi tomonidan tezkor tadbir o‘tkazilgan. Tadbirda Respublika tez tibbiy yordam markazi Andijon viloyati filiali dispetcheri M.A. fuqaro M.Q.ni 1,5 ming dollar evaziga Call-markazga ishga joylashtirib qo‘yishni vaʼda qilgani aniqlangan.
Dispetcher puldan 1 000 dollarni olgan vaqtida ushlangan. Uning ko‘rsatuviga asosan davom etgan tadbirda Respublika tez tibbiy yordam markazi Andijon viloyati filiali iqtisodchisi D.U. o‘z xizmat xonasida M.A.dan 1000 dollarni olgan vaqtida ashyoviy dalillar bilan qo‘lga tushgan.
Mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.
2022-yil dekabrda Qashqadaryo viloyatining Qarshi tumanida tibbiyot birlashmasi bosh shifokori 500 dollar pora bilan qo‘lga tushgani to‘g‘risida xabar berilgandi. Shuningdek, avgust oyida Andijon viloyatining Jalaquduq tumanida pora evaziga hamshiralikka ishga kiritib qo‘ymoqchi bo‘lgan shaxs ushlangan edi. 2023-yil aprelida esa Qashqadaryoda sog‘lom odamni ruhiy kasalxonaga ro‘yxatga qo‘ygan bosh shifokor qo‘lga olingandi.
