“Tolibon” Xitoyning “Bir kamar, bir yo‘l” forumida qatnashmoqchi — Reuters

“Tolibon” kelasi hafta Xitoyning “Bir kamar, bir yo‘l” forumida ishtirok etadi. Bu haqda “Tolibon” hukumati matbuot kotibi ma’lum qildi. U Pekin bilan rasmiy aloqalari kuchayib borayotganini ta’kidladi.

Hech bir davlat tomonidan rasmiy tan olinmagan “Tolibon” rasmiylari va vazirlari, asosan, Afg‘onistonga bag‘ishlangan mintaqaviy yig‘ilishlarda ishtirok etib kelayotgandi. “Bir kamar, bir yo‘l” forumi toliblar taklif qilingan eng nufuzli ko‘p tomonlama sammitlardan biridir.

17—18-oktyabr kunlari Pekinda bo‘lib o‘tadigan forum Xitoy raisi Si Szinpinning global savdoni rivojlantirish uchun qadimgi Ipak yo‘lini qayta tiklash sifatida eʼtirof etilgan ulkan global infratuzilma va energetika tashabbusining 10 yilligiga bag‘ishlanadi.

“Tolibon” savdo va sanoat vaziri vazifasini bajaruvchi Hoji Nuruddin Aziziy yaqin kunlarda Pekinga boradi, dedi vazirlik matbuot kotibi Oxundzoda Abdul Salam Javad Reuters agentligiga.

U Afg‘onistonga yirik investorlarni taklif qilishi kutilmoqda.

May oyida Xitoy, “Tolibon” va qo‘shni Pokiston rasmiylari “Bir kamar, bir yo‘l” loyihasiga Afg‘onistonni ham kiritish istagi borligini aytishgandi.