AQSH Isroilga yuborish uchun 2 ming harbiyni tanlab oldi — The Wall Street
Amerika Qo‘shma Shtatlari Isroilga yuborish uchun 2 ming harbiyni tanlab oldi, deb yozadi The Wall Street Journal Pentagon vakillariga tayanib.
Oq uyning Falastin-Isroil mojaro zonasiga qo‘shin yuborish rejasi yo‘qligi haqidagi bayonotlari fonida Qo‘shma Shtatlar Isroilga potensial joylashtiriladigan askarlarni tayyorlamoqda, deb yozadi nashr.
Nashr manbalariga ko‘ra, harbiylarning vazifalari maslahat berish va tibbiy yordam ko‘rsatish bo‘ladi. Ular jangovar harakatlarda qatnashish uchun mo‘ljallanmagan, deyiladi xabarda.
Avvalroq Oq uy Milliy xavfsizlik kengashining strategik aloqalar bo‘yicha koordinatori Jon Kirbi Fox News telekanaliga bergan intervyusida Qo‘shma Shtatlar Isroil-Falastin mojarosiga aralashish niyatida emasligini, biroq asirga olingan amerikaliklarni ozod qilish uchun AQSH qurolli kuchlaridan foydalanish mumkinligini aytib o‘tgandi.
