O‘zbekiston fuqarolarini AQSHga yuborishini aytib firibgarlik qilgan yana ikki kishi ushlandi
Toshkent shahri va viloyatida fuqarolarni AQSHga yuborishini aytib firibgarlik qilgan ikki kishi ushlandi.
Bosh prokuratura huzuridagi departamentning Yunusobod tuman bo‘limi tomonidan o‘tkazilgan tezkor tadbirda muqaddam sudlangan F.M. fuqaro J.K.ning ishonchiga kirib, uni go‘yoki yuqori lavozimlarda ishlovchi tanishlari yordamida 10 ming dollar evaziga AQSHga ishga yuborishini va’da qilib, oldindan 3 200 dollarni olgan vaqtida ashyoviy dalillar bilan ushlangan.
Departamentning Chinoz tuman bo‘limi tomonidan DXX va IIB xodimlari bilan hamkorlikda o‘tkazilgan tezkor tadbirda fuqaro D.X. fuqaro M.A.ning ishonchiga kirib, uni 16 ming dollar evaziga tanishlari yordamida AQSHga ishlash uchun yuborishini aytib, oldindan 3 ming dollarni firibgarlik yo‘li bilan olgan vaqtida ashyoviy dalillar bilan ushlangan.
Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
