Xorazmda ham ichimlik suvi va oqova xizmatlar narxi oshiriladi

Xorazm viloyatida ham ichimlik suvi va oqova xizmatlar bo‘yicha yangi tariflar tasdiqlandi. Bu haqda “O‘zsuvta’minot” matbuot xizmati xabar berdi.

Unga ko‘ra, 2023-yilning 3-noyabridan quyidagi belgilangan tariflar amalda qo‘llaniladi:

Ichimlik suvi:

• aholi uchun 1 m³ — 2800 so‘m;
• budjet tashkilotlari uchun 1 m³ — 5700 so‘m;
• ulgurji iste’molchilar uchun 1 m³ — 5 700 so‘m.

Oqova suv xizmati uchun:

• aholi uchun 1 m³ — 1550 so‘m;
• budjet tashkilotlari uchun 1 m³ — 2400 so‘m;
• ulgurji iste’molchilar uchun 1 m³ — 2400 so‘m.

Ma’lum qilinishicha, o‘tgan 5 yilda Xorazm viloyatida markazlashgan ichimlik suvi bilan ta’minlanish darajasi 52,1 foizdan 85,5 foizga yetkazildi. 2023-yil yakuni bilan bu ko‘rsatkich 90 foizga yetkazilishi kutilmoqda.

Aholiga ichimlik suvi yetkazib berish va oqova suv xizmati ko‘rsatishni yaxshilash bo‘yicha qilinayotgan ishlar qatorida Yevropa tiklanish va taraqqiyot bankining 150 million dollar qiymatida imtiyozli kredit mablag‘larini jalb qilish evaziga viloyat aholisini ichimlik suvi bilan taʼminlovchi quvvati 200 ming m³ li asosiy Pitnak ichimlik suvi tozalash inshootini rekonstruksiya qilish va quvvatini 400 ming m³ ga yetkazish (30 million dollar), ichimlik suvi manbasidan uzoq masofada bo‘lgan Gurlan, Yangibozor, Shovot tumanlarini uzluksiz ichimlik suvi bilan taʼminlash maqsadida Gurlan tumanida quvvati 50 ming m³ lik yangi ichimlik suvi tozalash inshootini qurish; Urganch, Xiva Pitnak kanalizatsiya tizimlarini rekonstruksiya qilish va yangidan qurish, Gurlan tumanida kanalizatsiya tizimlarini barpo qilish rejalashtirilgan.

Bundan tashqari ish haqi, elektr-energiya, soliq to‘lovlari, xorijiy kreditlar to‘lovi amalga oshirilgan bo‘lib, joriy va kapital ta’mirlash, tizimni modernizatsiya qilish ishlarida ham sarf-xarajatlar talab etiladi.

Yuqoridagilardan kelib chiqib, Xalq deputatlari Xorazm viloyat kengashining 18-oktyabrdagi qaroriga asosan Xalq deputatlari Xorazm viloyati Kengashi tomonidan Xorazm viloyatida ichimlik suvi ta’minoti va oqova suv xizmatlari uchun yangi tariflar (narxlar) tasdiqlandi.