Internetga 200 mingdan ortiq o‘zbekistonlikning maʼlumotlari tarqalib ketgani aytildi
Internetga 200 mingdan ortiq o‘zbekistonlik foydalanuvchilarning maʼlumotlari tarqab ketgani haqida xabarlar tarqaldi.
Aytilishicha, 18-oktyabr sanasida turli axborot resurslari, shu jumladan, respublika hududida joylashgan tizimlarga tegishli bo‘lgan foydalanuvchilar maʼlumotlari eʼlon qilingani aniqlangan. Ularning aksariyati dolzarb ahamiyatga ega bo‘lib, davlat organlari va boshqa tashkilotlarning axborot tizimlari xavfsizligiga kibertahdidlarni keltirib chiqarayotgani qayd etilgan.
Biroq Raqamli texnologiyalar vazirligi mazkur xabarlarni inkor etdi. Ta’kidlanishicha, Raqamli hukumat loyihalarini boshqarish markazi hamda Kiberxavfsizlik markazi bilan hamkorlikda OneID tizimi bo‘yicha tarqalgan xabar yuzasidan dastlabki tezkor o‘rganishlar o‘tkazilgan. Natijada OneID tizimiga hech qanday kiberhujum bo‘lmagani hamda tizim ishida nosozliklar aniqlanmagani ma’lum bo‘ldi. Muammo katta ehtimol bilan foydalanuvchilarning kompyuter qurilmalari virusli zararlangani oqibati bilan bog‘liqligi taxmin qilindi. Ayni paytda bunga qarshi tegishli chora-tadbirlar olib borilmoqda.
