HAMAS tomonidan garovga olinganlar soni 210 kishiga yetdi —  Isroil armiyasi

HAMAS tomonidan G‘azo sektorida garovga olinganlar soni 210 nafarga yetdi va bu haqda ularning oila a’zolari allaqachon xabardor qilingan. Bu haqda Isroil mudofaa kuchlarining kundalik hisobotida ma’lum qilindi.

Shuningdek, Isroil vakili Daniel Xagariy brifingda halok bo‘lgan isroillik harbiylar soni 307 nafarga yetganini ham ma’lum qildi.

Isroilning Falastinning HAMAS harakati bilan urushi 7-oktyabrdan beri davom etmoqda. Kecha, 20-oktabr kuni HAMAS ikki nafar garovga olinganlarni – AQSH fuqarolari Judit va Natali Raananlarni ozod qildi.

Bloomberg manbalarining xabar berishicha, Qo‘shma Shtatlar va Yevropa Ittifoqi Isroilni “hech bo‘lmaganda bir necha tinch aholini” ozod qilish bo‘yicha HAMAS bilan muzokaralarga vaqt ajratish uchun G‘azo sektoridagi quruqlikdagi operatsiyani kechiktirishga chaqirgan. The Wall Street Journal nashriga ko‘ra, AQSH, Isroil va Qatar o‘rtasida HAMAS bilan garovga olingan 50 kishi bo‘yicha muzokaralar muvaffaqiyatsizlikka uchragan.