Navoiyda davlatga 24,4 mlrd so‘m zarar keltirgan noqonuniy mayning ferma aniqlandi
Navoiy viloyatida elektr energiyasidan noqonuniy foydalangan yana bir mayning ferma aniqlandi. Bu haqda Energetika vazirligi matbuot xizmati xabar berdi.
Vazirlik huzuridagi “O‘zenergoinspeksiya” tomonidan Navoiy viloyatining Karmana tumanidagi qurilishi tugallanmagan binoda nazorat tadbiri o‘tkazilganda fuqaro R.E.I.ga tegishli, umumiy iste’mol quvvati 840,4 kVt ni tashkil etadigan mayning qurilmalari quvvati 630 kVt ga teng ikkita transformatorga o‘zboshimchalik bilan ulangani aniqlangan.
Holat bo‘yicha dalolatnoma rasmiylashtirilib, 24 milliard 415 million 300 ming so‘m qayta hisob-kitob qilingan.
Mazkur holat yuzasidan tegishli hujjatlar rasmiylashtirilib, huquqni muhofaza qiluvchi organlarga yuborilgan.
Navoiy viloyatida iyun oyida 9,6 milliard so‘mlik, iyul oyida esa salkam 1 milliard so‘mlik elektr energiyasidan noqonuniy foydalangan mayning ferma aniqlangandi.
