Toshkentning ikki tumani hududida avariyaviy ishlar sabab issiq suv ta’minoti vaqtincha o‘chiriladi
Shayxontohur va Chilonzor tumanlarining ayrim hududlarida 23-oktyabr kuni issiq suv taʼminoti vaqtincha to‘xtatiladi. Bu haqda Veolia Energy Tashkent kompaniyasi xabar berdi.
Qayd etilishicha, Xo‘jayev ko‘chasidagi issiqlik tarmoqlarida avariyaviy ishlar olib boriladi va tegishli jihozlar almashtiriladi. Shu munosabat bilan 23-oktyabr kuni quyidagi manzillarda issiq suv taʼminoti vaqtincha to‘xtatiladi:
- Shayxontohur tumani — Qo‘ratosh, Chorsu va Beshyog‘och dahalari.
- Chilonzor tumani — Olmazor dahasi.
Issiq suv taʼminoti taʼmirlash ishlari tugallanishi bilanoq (bugun soat 21:00 gacha) tiklanadi.
Veolia Energy Tashkent MCHJ XK vaqtinchalik noqulayliklar uchun oldindan uzr so‘raydi va issiq suv taʼminotini tezroq tiklash uchun barcha zarur choralarni ko‘radi.
Avvalroq Toshkentning Yashnobod tumanida tarmoq quvurlarini o‘tkazish ishlari yo‘l qatnovining maʼlum qismi yopilgan holda o‘tkazilishi to‘g‘risida xabar berilgandi. Shuningdek, Mirobod tumanining ayrim ko‘chalarida issiq suv taʼminoti bir necha kun davomida bo‘lmasligi aytilgan edi. Bunga Nukus—Oybek ko‘chasi kesishmasida joylashgan issiq suv quvurlarida 7-oktyabr kuni avariya holati yuz bergani sabab bo‘lmoqda.
