Jizzaxda fuqaro 372,1 mln so‘mlik tabiiy gazdan noqonuniy foydalangani aniqlandi
Jizzax shahrida fuqaro 372,1 million so‘mlik tabiiy gazdan noqonuniy foydalangani aniqlandi, deb xabar bermoqda Iqtisodiy jinoyatlarga qarshi kurashish departamenti axborot xizmati.
Xabarga ko‘ra, holat Bosh prokuratura huzuridagi departamentning Jizzax viloyat boshqarmasi tomonidan “O‘zenergoinspeksiya” Jizzax hududiy boshqarmasi xodimlari bilan hamkorlikda o‘tkazilgan tergovga qadar tekshiruvda aniqlangan. Jizzax shahar “Shodlik” MFYda yashovchi O.Sh. o‘z uyining yordamchi xo‘jaligida ohak ishlab chiqaruvchi yashirin sex tashkil etib, tijorat maqsadida umumiy foydalanishdagi gaz tarmog‘iga o‘g‘rilik yo‘li bilan ulanib, jami 372,1 million so‘mlik tabiiy gazdan noqonuniy foydalangani aniqlangan.
Mazkur holat yuzasidan Jinoyat kodeksining 169-moddasi (o‘g‘rilik) bilan jinoyat ishi qo‘zg‘atilib, tergov harakatlari o‘tkazilmoqda.
