Tramp Rossiyani “super-puper raketa” loyihasini o‘g‘irlaganlikda aybladi
Rossiya AQSHdan “super-puper” raketa loyihasini o‘g‘irlagan, dedi AQSH sobiq prezidenti Donald Tramp Nyu-Xempshirdagi chiqishi chog‘ida.
Trampning so‘zlariga ko‘ra, voqea Barak Obama maʼmuriyati davrida (2009–2017) sodir bo‘lgan.
“Ular maxfiy loyihalarni o‘g‘irlab, raketa qurishdi”, — dedi Tramp.
Sobiq prezident, shuningdek, amerikaliklarga Xitoy, Eron va Rossiya raketalarini urib tushirish uchun o‘z “Temir gumbaz”i zarurligini aytdi.
“Temir gumbaz” raketaga qarshi mudofaa tizimi 50 dan 200 kilometrgacha parvoz masofasiga ega bo‘lib, boshqarilmaydigan taktik raketalardan himoya qilish uchun mo‘ljallangan taktik tizim. Isroil armiyasi HAMASga qarshi urushda ushbu tizimdan foydalanmoqda.
Tramp birinchi marta 2020-yilning may oyida Qo‘shma Shtatlar o‘zining gipertovushli raketasini yaratishini e’lon qilib, uni “super-puper” deb ta’riflagandi. Keyinroq uning aniqlik kiritishicha, raketa dunyodagi eng tezkor deb topilgan raketadan 17 barobar tezroq uchadi va 1,6 ming km masofadagi nishonlarni ura oladi. CNN raketa 2020-yil mart oyida sinovdan o‘tkazilganini xabar qildi.
Rossiya Tashqi ishlar vazirligi rasmiy vakili Mariya Zaxarova Trampning so‘zlariga javoban, Moskva AQSHning da’volaridan hayratda ekanini aytdi.
