Qozog‘istondagi portlash qurbonlari soni 33 kishiga yetdi. Kondagi portlash sababi ochiqlandi
Qarag‘andadagi Kostenko konida sodir bo‘lgan portlash qurbonlari soni 33 kishiga yetdi. Bu haqda Qarag‘anda viloyati hokimi Ermaganbet Bulekpayevga tayanib, Tengrinews xabar berdi.
“Ayni paytda Kostenko konida yuz bergan fojia 33 nafar konchining hayotiga zomin bo‘ldi. Yana 13 nafar konchi bedarak yo‘qolganlar ro‘yxatida. Dastlabki versiyaga ko‘ra, lavada yong‘in sodir bo‘lgan. 252 konchidan 208 nafari yer yuzasiga olib chiqilgan, ulardan 18 nafari tibbiy yordamga murojaat qilgan”, — dedi Bulekpayev.
Hokimning so‘zlariga ko‘ra, jabrlanganlarning barchasi shifokorlar nazoratida.
Kondagi portlash sabablari
Dastlabki versiyaga ko‘ra, portlashga yong‘in va uning ortidan metan-havo aralashmasining keyingi portlashi sabab bo‘lgan. Metan-havo aralashmasining portlashi, zarba to‘lqini juda ko‘p qurbonlarga olib kelgan.
Kondagi portlash yong‘in haqida xabar berilganidan keyin sodir bo‘lgan.
“Portlashning kuchi shunday bo‘lganki, g‘arbiy va sharqiy bloklardagi telekommunikatsiya tizimi ishdan chiqqan. Zarba to‘lqini nafaqat favqulodda vaziyat hududiga, balki sharqiy blokda joylashgan K2 lavasiga ham ta’sir ko‘rsatgan. Zarba to‘lqinining tarqalish diapazoni 2 kilometrdan oshgan”, — deyiladi xabarda.
