Xitoydan Germaniyaga uchayotgan samolyot ikki yo‘lovchining janjali tufayli Toshkentga qo‘ndi
Xitoydan Germaniyaga uchayotgan samolyot yo‘lovchilar janjali tufayli Toshkentga qo‘ndi. Bu haqda Uzbekistan Airports matbuot xizmati xabar berdi.
Qayd etilishicha, Germaniyaning Lufthansa aviakompaniyasining Shanxaydan Frankfurtga uchayotgan LH729 yo‘lovchi reysi ikki yo‘lovchining janjali tufayli Toshkent xalqaro aeroportidagi muqobil aerodromga kelib qo‘ngan. Ekipaj samolyot oldiga huquq-tartibot organlari xodimlarini chaqirishni so‘ragan.
Bortida 206 yo‘lovchi bo‘lgan Boeing 747-800 mahalliy vaqt bilan 17:32 da favqulodda qo‘nishni amalga oshirgan. Janjal ko‘targan yo‘lovchilar reysdan olib tashlangan. Havo kemasi Toshkentdan belgilangan aeroportga soat 20:36 da uchib ketgan.
Avvalroq Panorama Airways’ning 27-oktyabr kuni Toshkentdan Madinaga uchgan samolyoti ortga qaytishga majbur bo‘lgani, Moskvadan Toshkentga uchayotgan samolyotda yo‘lovchi vafot etgani to‘g‘risida xabar berilgandi.
