O‘zbekistonda tajriba tariqasida 5 ta shahardagi ichimlik va oqova suv ta’minoti xususiy sektorga beriladi
“Ichimlik suv taʼminoti va oqova suv tizimini yanada takomillashtirish bo‘yicha qo‘shimcha chora-tadbirlar to‘g‘risida”gi prezident qarori qabul qilindi, deb xabar beradi Telegram’dagi “Huquqiy axborot” kanali.
Qarorga ko‘ra, “O‘zsuvtaʼminot” AJ va uning tarkibidagi korxonalar negizida 2024-yil 1-aprelgacha alohida yo‘nalishlar bo‘yicha quyidagi aksiyadorlik jamiyatlari tashkil etiladi:
- hududiy magistral suv taʼminoti tashkilotlari;
- Qoraqalpog‘iston Respublikasi, viloyatlar va Toshkent shahrida hududiy ichimlik suv taʼminoti tashkilotlari.
2024-yil 1-yanvardan:
- ichimlik suv va oqova suvni chiqarib yuborish narxlari mahsulot tannarxiga kiritilgan xarajatlar, tizimni rivojlantirish, moliyaviy xarajatlar, soliqlar va majburiy to‘lovlardan kelib chiqib shakllantiriladi;
- yangi quriladigan ichimlik va oqova suv yo‘nalishidagi obyektlar va tizimlarni loyihalashtirishda mazkur hududning to‘liq qamrov darajasini inobatga olish talabi o‘rnatiladi.
Qarorga ko‘ra, 2024–2026-yillarda:
- ichimlik suv taʼminoti og‘ir bo‘lgan jami 813 ta mahalla ichimlik suv bilan taʼminlanadi;
- 124 693 ta xonadonga ichimlik suv tarmoqlari uy xo‘jaligigacha yetkaziladi;
- 130 ta aholi yashash punktlarida davlat ijtimoiy buyurtmalarini berish orqali ichimlik suv taʼminoti yo‘lga qo‘yiladi;
- 792 090 nafar isteʼmolchilar ichimlik suv uchun hisoblagichlar bilan taʼminlanadi.
2024-yil 1-iyuldan tajriba tariqasida Kogon, Shirin, Yangiyer, Bekobod va Yangiyo‘l shaharlarida ichimlik va oqova suv taʼminoti davlat-xususiy sheriklik asosida xususiy sektorga beriladi.
Oktyabr oxirlarida Shavkat Mirziyoyev hududlarda ichimlik suvi ta’minoti va oqova suv tizimini yaxshilash, oziq-ovqat ekinlarini ekish masalalari bo‘yicha yig‘ilish o‘tkazgandi. O‘shanda davlat rahbaari eskirgan ichimlik suvi nasoslarini energiya tejamkoriga almashtirish zarurligini aytgan edi.
