Toshkent xalqaro aeroportida kutib olish zali ochildi

Toshkent xalqaro aeroportining uchib kelish hududida kutib oluvchilar uchun pavilyon qurilishi yakunlandi, deb xabar beradi Uzbekistan Airports matbuot xizmati.

Qayd etilishicha, umumiy maydoni 500 kvadrat metr bo‘lgan alohida pavilyon xalqaro aeroportning uchib kelish zali yonidagi P2 avtoturargohida joylashgan. Ushbu pavilyonda kutib oluvchilar uchun o‘rindiqlar mavjud bo‘lib, yaqin kunlarda kafe va gul do‘koni ochiladi hamda savdo avtomatlari, bankomatlar, mobil qurilmalar uchun zaryadlash punktlari o‘rnatiladi.

“Qurilgan pavilyon vaqtinchalik yechim hisoblanadi. Ayni paytda mavjud terminalni kengaytirish loyihasini ishlab chiqish yakuniy bosqichda bo‘lib, u yerda kutib oluvchi va kuzatuvchilar uchun barcha sharoitlar yaratiladi”, — deyiladi xabarda.

Avvalroq Toshkent aeroporti yo‘l o‘tkazgichi (estakada)dagi kameralar jarima sola boshlashi to‘g‘risida xabar berilgandi. Yo‘l o‘tkazgichga o‘rnatilgan yo‘l kameralari endilikda YHXB tizimlari bilan integratsiyalashgan.