Toshkentning ayrim ko‘chalarida 8-10-noyabr kunlari harakatlanish cheklanadi

Toshkentda Iqtisodiy hamkorlik tashkilotining 16-sammiti o‘tkazilishi munosabati bilan 8-noyabrdan 10-noyabrgacha poytaxtning ayrim ko‘chalarida harakatlanish cheklanadi. Bu haqda Toshkent shahar IIBB axborot xizmati xabar berdi.

Jumladan,

• Islom Karimov nomidagi aeroport maydonidan Bobur ko‘chasi bo‘ylab Bobur — Shota Rustaveli chorrahasigacha;
• Nukus — Bobur chorrahasidan Nukus ko‘chasi bo‘ylab Movarounnahr ko‘chasigacha;
• Oybek — Turkiston chorrahasidan Oybek, Afrosiyob va Olmazor ko‘chalari;
• Islom Karimov — Bunyodkor chorrahasidan Islom Karimov ko‘chasi bo‘ylab Amir Temur — Islom Karimov chorrahasigacha;
• Sharof Rashidov — Afrosiyob chorrahasidan Sharof Rashidov ko‘chasi bo‘ylab Kichik halqa aylanma yo‘ligacha;
• Navoiy — Mustaqillik chorrahasidan Navoiy — Labzak chorrahasigacha;
• Furqat – Beshyog‘och chorrahasidan Beshyog‘och ko‘chasi bo‘ylab Islom Karimov — Beshyog‘och chorrahasigacha;
• Olmazor — Islom Karimov chorrahasidan Olmazor ko‘chasi bo‘ylab Navoiy ko‘chasigacha.

Qayd etilishicha, harakatlanish cheklangan ko‘chalarda tez-tibbiy yordam, favqulodda vaziyatlar bo‘linmalari transport vositalariga istisno tariqasida harakatlanish uchun ruxsat beriladi.

“Hurmatli haydovchilar, shu kunlardan yo‘llarda tirbandliklarni oldini olish maqsadida aylanma yo‘llardan foydalanishni tavsiya qilamiz. Sizlardan yuzaga keladigan vaqtinchalik noqulayliklar uchun uzr so‘raymiz”, — deyiladi xabarda.

Avvalroq 8—9-noyabr kunlari Iqtisodiy hamkorlik tashkilotining 16-sammiti o‘tkazilishi munosabati bilan Toshkent shahriga yuk tashuvchi transport vositalarining kirishi qisman cheklanishi to‘g‘risida xabar berilgandi.