AQSH Davlat departamenti Ruminiyaga M1A2 Abrams tanklarini 2,53 milliard dollarga sotishni ma’qulladi
AQSH Davlat departamenti Ruminiyaga 2,53 milliard dollarga 54 ta M1A2 Abrams tanklari va jihozlarini sotishni ma’qulladi, deyiladi Pentagon Xavfsizlik Hamkorligi boshqarmasi (DSCA) press-relizida.
Bu borada Kongressga tegishli bildirishnoma yuborildi. DSCA Amerika tanklarini sotish Ruminiyaning joriy va kelajakdagi tahdidlarga qarshi turish qobiliyatini yaxshilashiga, shu bilan birga “mintaqadagi kuchlarning harbiy muvozanatini o‘zgartirmasligi”ga ishontirmoqda.
“Taklif etilayotgan tanklarni sotish Yevropadagi siyosiy va iqtisodiy barqarorlik uchun muhim kuch bo‘lgan NATO ittifoqchisi xavfsizligini yaxshilashga yordam beradi va bu orqali Qo‘shma Shtatlarning tashqi siyosati va milliy xavfsizlik maqsadlarini qo‘llab-quvvatlaydi”, — deyiladi departament xabarida.
Yanvar oyida AQSH rasmiylari 101-havo-desant diviziyasi brigadasi Ruminiyada bo‘lishini yana to‘qqiz oyga uzaytirdi. AQSH askarlari 2022-yil boshida NATOning sharqiy qanotini mustahkamlash uchun mamlakatga kiritilgan.
Aprel oyida Ruminiya Mudofaa vazirligi 54 ta modernizatsiya qilingan Amerika Abrams tanklarini sotib olish uchun parlamentdan ruxsat olishni so‘ragan edi.
