Ramzan Qodirovning uch nafar o‘g‘li yana bir orden bilan taqdirlandi
Ramzan Qodirovning o‘g‘illari Ahmat, Eli va Adam Checheniston parlamentining oliy ordeni — “Vatan iftixori” ordeni bilan taqdirlandi.
Checheniston yetkachisining farzandlari mukofotlanganini respublikani milliy siyosat va tashqi aloqalar bo‘yicha vaziri Ahmed Dudayev ma’lum qildi. U Ahmat, Eli va Adamni “yosh avlod uchun o‘rnak”, deb atagan.
Sentyabr o‘rtalarida Adam Qodirov Qur’onni yoqib, dindorlarning tuyg‘ularini haqoratlashda ayblanayotgan volgogradlik Nikita Juravelni Checheniston tergov izolyatorida kaltaklagani aks etgan video e’lon qilingandi. Ramzan Qodirov o‘g‘lining qilmishidan faxrlanishini aytgan.
Oy oxirlarida Rossiyaning Qorachoy-Cherkesiya Respublikasi rahbari Rashid Temrezov Ramzan Qodirovning 15 yoshli o‘g‘li Adamga respublika oliy davlat mukofoti topshirilganini ma’lum qildi. Bir necha kun oldin esa Adam Qodirov Checheniston Respublikasi rahbarining xavfsizlik xizmatida “muhim lavozim”ga tayinlandi.
Ichki ishlar vazirligining Ahmat Qodirov nomidagi Checheniston bo‘yicha maxsus polki komandiri Zamid Chalayev o‘zining Instagram’dagi sahifasida bunga oydinlik kiritib, Qodirovning 15 yoshli o‘g‘li Checheniston rahbarining xavfsizlik boshqarmasi boshlig‘i lavozimiga tayinlanganini ma’lum qildi.
