Jizzaxda ombor mudiri 2,3 ming tonnadan ortiq ko‘mirni talon-toroj qilgani ma’lum bo‘ldi 

Jizzax viloyati Zarbdor tumanida aholiga imtiyozli narxda sotish uchun ajratilgan ko‘mirni talon-toroj qilish holati aniqlandi, deb xabar beradi Bosh prokuratura huzuridagi departament.

Ma’lum qilinishicha, departamentning Jizzax viloyat boshqarmasi tomonidan tergovga qadar tekshiruv o‘tkazilgan. Tekshiruvda “Ko‘mir taʼminot” MCHJning Zarbdor ko‘mir ombori mudiri B.B. va boshqalar aholiga imtiyozli narxda sotish uchun ajratilgan 2 346 tonna ko‘mirni go‘yoki tumandagi 851 ta xonadonga imtiyozli narxda sotilgani to‘g‘risida soxta hujjatlarni rasmiylashtirib, amalda ko‘mirni qimmat narxlarda boshqa shaxslarga naqd pulga sotib, talon-toroj qilganliklari aniqlangan.

Mazkur holat yuzasidan Jinoyat kodeksining tegishli moddalari bilan jinoyat ishi qo‘zg‘atilib, tergov harakatlari o‘tkazilmoqda.

Bundan oldin Andijonning Andijon, Buloqboshi, Jalaquduq tumanlarida aholiga ajratilgan ko‘mirni talon-toroj qilgan ombor mudirlari qo‘lga olingani to‘g‘risida xabar berilgandi.