Qozog‘istonda ikki nafar o‘zbekistonlik o‘g‘irlangan avtomobilda YTHga uchradi
Qozog‘istonning Uralsk shahrida ikki nafar o‘zbekistonlik o‘g‘irlangan avtomobilda yo‘l-transport hodisasini sodir etdi. Bu haqda mamlakat IIV matbuot xizmati xabar berdi.
Ma’lum qilinishicha, 13-noyabr kuni kechasi politsiyachilarni Volkswagen Passat avtomobili shubha uyg‘otgan. Ular haydovchiga to‘xtash ishorasini ko‘rsatganida mashina buyruqqa bo‘ysunmay harakatni davom ettirgan va oqibatda Abdolov ko‘chasidagi uylardan birining panjarasiga borib urilgan.
Shundan so‘ng, haydovchi qo‘lga olingan. Aniqlanishicha, mashina ichida ikki kishi bo‘lgan — ular O‘zbekiston fuqarolaridir. 1996-yilda tug‘ilgan fuqaro mast holatda bo‘lgan. Buning ustiga surishtiruv davomida avtomobil o‘g‘irlangani ham aniqlangan.
Holat yuzasidan Qozog‘iston Jinoyat kodeksining tegishli moddalari bilan hozirda sudga qadar tergov harakatlari olib borilmoqda. Mamlakat qonunchiligiga muvofiq, bunday huquqbuzarlik sodir etgan shaxslar 5 yilgacha ozodlikdan mahrum etilishi mumkin.
Avgust oxirlarida Qozog‘istonda o‘zbekistonlik haydovchi boshqaruvidagi fura yengil avtomobil bilan to‘qnashgandi. Oqibatda bir kishi halok bo‘lgan, bir kishi esa kasalxonaga yotqizilgan edi.
