Yevropa Ittifoqi O‘zbekiston firmalariga sanksiya qo‘llamoqchi — Bloomberg

Bloomberg Yevropa Ittifoqining Rossiya Federatsiyasiga qarshi sanksiyalarining 12-paketi tafsilotlarini oshkor qildi.

Ma’lum qilinishicha, suyuq propan, quyma temir, mis va alyuminiy simlar, folga va quvurlar importiga nisbatan sanksiyalar joriy etish taklif qilinmoqda. Agar paket ma’qullansa, ro‘yxatga savdo aloqalari cheklangan 30 dan ortiq kompaniyalar, jumladan Qozog‘iston, O‘zbekiston, Singapur firmalari va Rossiyaning bir qancha injiniring kompaniyalari kiradi.

Reuters’ning yozishicha, Yevropa Ittifoqi Rossiyaga qarshi sanksiyalarning 12-paketi doirasida 47 kishi va 72 yuridik shaxsga nisbatan cheklovlar joriy etishni taklif qilmoqda. Ularning Yevroittifoqqa kirishi taqiqlanadi va Yevropadagi aktivlari muzlatiladi.

Shuningdek, Yevroittifoq Rossiya neftining barreliga 60 dollargacha yuqori narx belgilash choralarini kuchaytirishni rejalashtirmoqda.