O‘zbekiston aeroportlarida unutib qoldirilgan yuklar sotilishi aytilgan xabarlar rad etildi
Uzbekistan Airports Toshkent xalqaro aeroportida unutib qoldirgan yuklar sotilishi to‘g‘risida tarqalgan xabarlarga munosabat bildirdi.
Ijtimoiy tarmoqlarda 16-noyabr kuni ijtimoiy tarmoqlarda “Toshkent” xalqaro aeroportida yo‘lovchilar unutib qoldirgan yuklar sotilishi bilan bog‘liq xayriya aksiyasi o‘tkazilayotgani haqida maʼlumot tarqaldi.
Uzbekistan Airports boshqaruv kompaniyasi fuqarolarni bu kabi yolg‘on ma’lumotlarga ishonmaslikka chaqirdi.
Qayd etilishicha, O‘zbekistonning 11 ta xalqaro aeroportlaridan birortasi, shuningdek, UzCargo va Uzbekistan Airports Handling sho‘ba korxonalari tomonidan yo‘lovchilarning unutilgan yuklari sotilmaydi va uchinchi shaxslarga topshirilmaydi. Barcha yo‘qolgan yuklar aeroport omborlarida 3 oy mobaynida saqlanadi va saqlash muddati tugashi bilan utilizatsiya qilinadi.
“Uzbekistan Airports sizni yolg‘on maʼlumotlarga ishonmaslikka va firibgarlarga pul o‘tkazmaslikka chaqiradi”, — deyiladi munosabatda.
Avvalroq Toshkent xalqaro aeroporti panjarasi ortida turgan samolyotlarni suratga olgan yigitlar qo‘lga olingani to‘g‘risida xabar berilgandi. O‘z navbatida Uzbekistan Airports O‘zbekistondagi spotting harakatini qo‘llab-quvvatlashi va yosh avlodni ushbu hobbi bilan shug‘ullanishiga to‘sqinlik qilmasligini bildirib chiqdi.
