Toshkent va Jizzaxdagi dorixonalarda kuchli ta’sir qiluvchi dori vositalari sotilayotgani aniqlandi
Toshkent shahri va Jizzax viloyatida kuchli taʼsir qiluvchi dori vositalarining muomalaga kiritilishiga chek qo‘yildi, deb xabar beradi Bosh prokuratura huzuridagi departament.
Qayd etilishicha, departamentning Jizzax viloyat boshqarmasi tomonidan IIB xodimlari bilan hamkorlikda tezkor tadbir o‘tkazilgan. Tadbirda “Z.-F.” xususiy korxonasi dorixona sotuvchisi B.M. jami 409 ta “Tebantin” va “Karbamazepin” nomli kuchli taʼsir qiluvchi dori vositalarini fuqaro M.M.ga 1 million so‘mga sotgan vaqtida ushlanib, dorixonadan yana 60 dona “Tebantin” dori vositasi ashyoviy dalil sifatida olingan.
Shu kabi, departamentning Uchtepa tuman bo‘limi tomonidan DXX va IIV xodimlari bilan hamkorlikda o‘tkazilgan tezkor tadbirda “L.7.” MCHJ rahbari SH.E. va boshqalar MCHJ dorixonasida hech qanday hujjatsiz 20 dona “Gabapentin kanon” nomli kuchli taʼsir qiluvchi dori vositasini fuqaro A.A.ga sotgan vaqtida ushlanib, dorixonadan yana 928 dona dori vositasi ashyoviy dalil sifatida olingan.
Mazkur holatlar yuzasidan Jinoyat kodeksining 251-1-moddasi (kuchli taʼsir qiluvchi yoki zaharli moddalarni qonunga xilof ravishda muomalaga kiritish) bilan jinoyat ishlari qo‘zg‘atilib, tergov harakatlari o‘tkazilmoqda.
Bundan oldin Sirdaryoda psixotrop dorilar savdosi bilan shug‘ullangan shaxslar qo‘lga olingani, DXX Tojikiston va Qirg‘izistondan olib kelingan giyohvand moddalar savdosi bilan shug‘ullanuvchi shaxslarni ushlagani, Toshkent viloyatida o‘tkazilgan nazorat-reyd tadbirlarida sintetik giyohvand vositalarini tayyorlovchi laboratoriya tashkil qilgan shaxslar qo‘lga olingani to‘g‘risida xabar berilgandi.
