“Har bir qirg‘izistonlik Issiqko‘lning ifloslanish ko‘lamini bilsa, dahshatga tushadi” — deputat

Bishkekda “Tunuk kel – Tunuk kelechek” ekologik forumi bo‘lib o‘tdi. Unda Issiqko‘ldagi pansionatlar uchun tozalash inshootlarini o‘rnatish masalalari muhokama qilindi. Bu haqda Economist xabar berdi.

Deputat Kamila Taliyeva o‘z nutqida har bir qirg‘izistonlik Issiqko‘l atrof-muhit ifloslanishi ko‘lamini bilsa, dahshatga tushishini ta’kidladi.

“Issiqko‘l viloyati hududida geopark tashkil qilish kerak. Xitoyda ham shunday tajriba bor. Kerakli meʼyoriy hujjatlarni ishlab chiqish uchun fuqarolik tashkilotlari va ekologlarning yordami kerak. qirg‘iz xalqi azaldan tabiat bilan hamnafas yashab kelgan, ammo atrof-muhitni asrash uchun har bir fuqaro mas’uliyatni o‘z zimmasiga olishi kerak”, — dedi deputat.

Kamila Taliyeva Jogorku Keneshda ko‘lni muhofaza qilish bo‘yicha yangi qonun loyihasi ishlab chiqilayotganini qo‘shimcha qildi.