O‘zbekistondan Afg‘onistonga elektr energiyasi yetkazib berish 50 foizga kamaydi
Afg‘oniston milliy elektr kompaniyasi (Da Afghanistan Breshna Sherkat — DABS) O‘zbekistondan elektr energiyasi yetkazib berish ikki baravar qisqarganini ma’lum qildi. Bu haqda Hasht-e Subh Daily xabar berdi.
DABS maʼlumotlariga ko‘ra, eksportning kamaygani O‘zbekistondagi energetika infratuzilmasini taʼmirlash ishlari bilan bog‘liq. Balx, Samangon, Bag‘lon, Parvon, Kapisa, Panjsher, Kobul, Nangarhor, Lag‘mon, G‘azni, Maydon-Vardak, Logar, Paktiyo va Xost viloyatlari aholisi elektr ta’minoti muddatlari qisqarishi haqida ogohlantirilgan.
“Bugun (23-noyabr) elektr energiyasini yetkazib berish normal holatga qaytishi kerak”, — deyiladi xabarda.
Oxirgi marta qishda O‘zbekiston elektr energiyasini yetkazib berishda jiddiy uzilishlar kuzatilgan edi – o‘shanda 20 kun ichida Kobul sanoatining 90 foizi faoliyatini to‘xtatgandi. Afg‘oniston elektr energiyasining asosiy qismini qo‘shni davlatlar, xususan Turkmaniston va O‘zbekistondan import qiladi.
