Tailandda erkak to‘yi kuni kelin va uning yaqinlarini otib tashladi
Tailandda Chaturong Suksuk ismli erkak to‘y kuni kelin, uning onasi va singlisini, shuningdek, yana bir mehmonni otib o‘ldirdi, deb xabar bermoqda BBC.
29 yoshli sobiq harbiy va para-sportchi o‘zining 44 yoshli rafiqasi Kanchana Pachuntuekni ular turmush qurganidan bir necha soat o‘tib o‘ldirdi.
Mahalliy OAV yozishicha, erkak kutilmaganda to‘yni tark etib, qurol bilan qaytgan. U kelinning onasi va singlisini, shuningdek, to‘ydagi mehmonni otib o‘ldirgan. Yana bir mehmon jiddiy jarohat olgan.
“Informator” yozishicha, qotillikdan keyin erkak o‘z joniga qasd qilgan.
Mehmonlar ziyofatda kuyovning ko‘rinishi g‘amgin va qattiq mast ekanini payqashgan. Ular Chaturong rafiqasidan 15 yosh kichik ekani sabab o‘ziga nisbatan ishonchsizlik his qilganini ta’kidladi.
Politsiya ma’lumotlariga ko‘ra, Chaturong sobiq askar, u poyezd bosib ketib, bir oyog‘i uzilganidan keyin nogiron bo‘lib qolgan.
Erkak o‘tgan yili Indoneziyada bo‘lib o‘tgan ASEAN Paralimpiya o‘yinlarida suzish bo‘yicha kumush medalni qo‘lga kiritgan. Shuningdek, u kelasi oy Tailandda bo‘lib o‘tadigan Jahon sport o‘yinlarida ishtirok etuvchi sportchilar ro‘yxatiga kiritilgandi, deb xabar berdi mahalliy OAV.
