Olmaliqda kadastr xodimi pora olayotganida qo‘lga tushdi
Davlat kadastrlar palatasi Olmaliq shahar filiali bosh muhandisi A.I. pora olayotganida ushlandi. Bu haqda Bosh prokuratura matbuot xizmati xabar berdi.
Ma’lum qilinishicha, u Olmaliq shahrining Xonobod ko‘chasida joylashgan 0,28 gektardan iborat yer uchastkasini uch qismga bo‘lib berish hamda har bir yer uchastkasiga alohida kadastr hujjatlarini rasmiylashtirib berish evaziga fuqarodan 4 000 AQSH dollari miqdoridagi pulni pora sifatida talab qilgan.
Bu haqda fuqaro Toshkent viloyati IIB JQB Yer resurslari talon-toroj qilinishiga qarshi kurashish bo‘linmasiga murojaat qilgan.
Kadastr xodimi oldindan 1 800 AQSH dollarini olgan. Keyinchalik qolgan 2 200 AQSH dollarini fuqarodan olayotganida viloyat prokuraturasi va huquqni muhofaza qiluvchi organ xodimlari bilan hamkorlikda o‘tkazilgan tezkor tadbirda ashyoviy dalillar bilan ushlangan.
Mazkur holat yuzasidan departamentning viloyat boshqarmasi tomonidan Jinoyat kodeksining 210-moddasi (pora olish) bilan jinoyat ishi qo‘zg‘atilib, dastlabki tergov harakatlari olib borishga kirishilgan.
