Afg‘oniston temiryo‘lchilar boshlig‘ini Turkmanistonga jo‘natdi

Afg‘oniston temir yo‘llari departamenti rahbari Baxtu Rahmon Sharaf Turkmaniston tomonining taklifiga binoan Ashxobodga ketdi. 

 

Delegatsiya ikki tomonlama hamkorlik, yuk tashish sifatini oshirish va transport masalalarini muhokama qiladi. Ikki davlat yaqinda Serxetoboddan Turg‘undigacha bo‘lgan temiryo‘l liniyasida yuk tashish hajmini oshirishga kelishib olgandi.

Mutaxassislarning “Daryo”ga ma’lum qilishicha, mazkur quruqlik porti Lapis Lazuli (Afg‘oniston–Turkmaniston–Ozarbayjon–Gruziya–Turkiya) xalqaro tranzit loyihasiga kiritilgan. Loyihaga ko‘ra, temiryo‘l va avtomobil yo‘llari Turg‘undini Ashxobod bilan, keyin esa Kaspiy dengizidagi Turkmanboshi porti bilan bog‘lashi kerak. Yo‘lak Bokugacha davom etadi, so‘ngra Tbilisi orqali Anqara, Poti va Batumiga boradi.

Turkmaniston Turkmaniston–Afg‘oniston–Tojikiston temiryo‘li qurilishi orqali Xitoy bozorlariga, u yerdan esa Osiyo-Tinch okeani mintaqasiga chiqishni kutmoqda.

Ashxobod allaqachon Afg‘oniston chegaralariga temiryo‘l liniyalarini yotqizgan va Afg‘onistonning Akina va Hirot shaharlariga rels yotqizish vazifasini o‘z zimmasiga olgan.

Aziz Boyarov