O‘zbekistonda atmosferaga chiqarilayotgan gazlarni hisobga olish bo‘yicha Milliy reyestr yaratiladi
O‘zbekistonda tashlanmalar Milliy reyestri yaratiladi. Bu haqida Ekologiya, atrof-muhitni muhofaza qilish va iqlim o‘zgarishi vazirligi xabar berdi.
Ma’lum qilinishicha, BMTning iqlim o‘zgarishi bo‘yicha 28-konferensiyasi (COP-28) doirasida Ekologiya, atrof-muhitni muhofaza qilish va iqlim o‘zgarishi vaziri Aziz Abduhakimov va Industrial Innovation Group bosh direktori Taram Matar Taram o‘zaro anglashuv memorandumini imzoladi. Hujjat Milliy uglerodli kredit tizimini yaratish doirasidagi hamkorlikka qaratilgan.
Memorandum O‘zbekistonning tashlanmalarni kamaytirish bo‘yicha milliy strategiyasiga muvofiq tuzilgan. Bunga qadar Ekologiya, atrof-muhitni muhofaza qilish va iqlim o‘zgarishi vazirligi atmosferaga chiqarilayotgan gazlarni hisobga olish bo‘yicha Milliy reyestrni yaratish tashabbusi bilan chiqqandi.
Uchrashuvda Aziz Abduhakimov reyestrning yaratilishi iqlim o‘zgarishi muammosini hal etishda samarali yondashuv ekanligini, mavjud tashlanmalarni tartibga solish va kamaytirish bo‘yicha loyihalarni rag‘batlantirish tizimlarini integratsiyalashda muhim ahamiyat kasb etishini ta’kidladi.
O‘z navbatida Matar Taryam mazkur reyestrni yaratishga hissa qo‘shish tashkilot uchun katta sharaf ekanligini qayd etdi. U ushbu hamkorlikning yo‘lga qo‘yilgani O‘zbekistonning barqaror rivojlanish va ekologik xavflarni kamaytirishga intilishidan dalolat berishini, bu esa bugungi kundagi global iqlim muammolari sharoitida, ayniqsa, muhim ekanini aytdi.
O‘zbekistonning birgalikdagi tashlanmalar inventarizatsiyasi mamlakatning ekologik izlarini to‘g‘ri baholash va uglerodni nazorat qilish tashabbuslari asosini ishlab chiqish uchun ishonchli yondashuv hisoblanadi. Reyestr tashlanmalarni muntazam ravishda kuzatib borish va uglerod xavfini kamaytirish loyihalarini aniq baholashi mumkin bo‘lgan keng qamrovli platforma bo'lib xizmat qiladigan muhim havolani yaratadi.
Industrial Innovation Group — bosh qarorgohi BAAda joylashgan transmilliy kompaniyalar guruhi. U murakkab, yuqori texnologiyali tizimlarni yaratish, yirik sanoat va innovatsion majmualarni loyihalash va qurish bo‘yicha 30 yillik katta tajribaga ega. Tashkilot turli biznes tarmoqlari uchun barqaror yo‘llarni ishlab chiqadi, uglerod xavfini kamaytirish tashabbuslarini konseptuallashtiradi, turli uglerod kredit registrlari uchun dizayn hujjatlarini yaratadi, shuningdek, bioko‘mir — Hemporama Biochar’ning global ishlab chiqaruvchisi hisoblanadi.
