Toshkent shahri va viloyatidagi uchta zapravkada 34,6 mlrd so‘mlik gazdan noqonuniy foydalanildi
Toshkent shahri va viloyatidagi 3 ta AGTKSH 34 milliard 640 million so‘mlik tabiiy gazdan noqonuniy foydalangani aniqlandi. Bu haqda “O‘zenergoinspeksiya” matbuot xizmati xabar berdi.
1-dekabr kuni Energetika vazirligi huzuridagi “O‘zenergoinspeksiya” tomonidan Toshkent shahar prokuraturasi bilan hamkorlikda Toshkent shahri va Toshkent viloyatidagi avtomobillarga gaz to‘ldirish kompressor shoxobchalarida o‘tkazilgan nazorat tadbirlarida tabiiy gazdan noqonuniy foydalanish holatlari aniqlandi.
Xususan, Toshkent shahrinig Bektemir tumanida joylashgan “T.V.G.” MCHJ, Toshkent viloyatining Yuqori Chirchiq tumanida joylashgan “O.E.G.” MCHJ va “P.O.” MCHJga qarashli AGTKSH tomonidan gazning haqiqiy sarfini kamaytirib ko‘rsatish maqsadida hisobga olish priborini ulash tartibi hamda sxemalari o‘zgartirilgan.
Dastlabki hisob-kitoblarga ko‘ra, mazkur uchta shoxobcha tomonidan davlat manfaatlariga jami 34 milliard 640 million so‘mlik zarar yetkazilgani aniqlangan. Qoidabuzar isteʼmolchilarga nisbatan belgilangan tartibda chora ko‘rish uchun tegishli hujjatlar huquqni muhofaza etuvchi organlarga taqdim qilingan.
