Prezident farmoyishi bilan Navoiy viloyat sudi raisi va uning o‘rinbosari lavozimdan olindi
Navoiy viloyat sudining raisi hamda uning o‘rinbosari lavozimdan olindi. Bu haqda Sudyalar oliy kengashi matbuot xizmati xabar berdi.
Ma’lum qilinishicha, O‘zbekiston prezidentining tegishli farmoyshiga muvofiq, yozma arizalariga asosan
- Hamidulla Qudratov Navoiy viloyat sudining raisi lavozimidan;
- Abdumannon Shaydoyev Navoiy viloyat sudi raisining o‘rinbosari – jinoyat ishlari bo‘yicha sudlov hayʼati raisi lavozimidan ozod qilingan.
O‘zbekiston prezidentining tegishli farmoyshi bilan Abdullo Allayev sudyalik vakolati muddati davrining besh yil muddatiga Navoiy viloyat sudining raisi lavozimiga tayinlandi va shu munosabat bilan Buxoro viloyat sudi raisining o‘rinbosari — jinoyat ishlari bo‘yicha sudlov hayʼati raisi lavozimidan ozod qilindi.
Shuningdek:
- Giyosiddin Yalgashev sudyalik vakolati muddati davrining besh yil muddatiga Navoiy viloyat sudi raisining o‘rinbosari – jinoyat ishlari bo‘yicha sudlov hayʼati raisi lavozimiga;
- Ilyosjon Usmonov sudyalik vakolati muddati davriga Buxoro viloyat sudi raisining o‘rinbosari – jinoyat ishlari bo‘yicha sudlov hayʼati raisi lavozimiga tayinlandi.
O‘zbekiston prezidentining tegishli farmoyishiga muvofiq, beshta viloyat sudlarining raislari o‘zgargandi.
Bundan oldin O‘zbekistonda 6 nafar sudya lavozimida o‘zgarish ro‘y bergani, Qashqadaryoda fuqaro nogironlik nafaqasini ololmay qolganiga sabab bo‘lgan sudyaga chora ko‘rilgani, Sudyalar oliy kengashida bir qator yangi tayinlovlar amalga oshirilgani to‘g‘risida xabar berilgandi.
Shuningdek, O‘zbekistonda 2023-yilning olti oyida 12 nafar sudya lavozimidan ozod qilinib, vakolatlari muddatidan ilgari tugatilgan edi.
