Navoiyda elektr energiyasidan noqonuniy foydalangan yana bir mayning ferma aniqlandi
Navoiy viloyatining Qiziltepa tumanida elektr energiyasidan noqonuniy foydalangan mayning ferma aniqlandi. Bu haqda “Hududiy elektr tarmoqlari” matbuot xizmati xabar berdi.
Ma’lum qilinishicha, ushbu mayning ferma “Hududiy elektr tarmoqlari” Navoiy hududiy filiali hamda huquqni muhofaza qiluvchi organ xodimlari hamkorligida reyd tadbirlari davomida aniqlangan.
Qiziltepa tumani “Yashnaobod” mahallalasi hududida joylashgan “Xayrullo-Narzullo” fermer xo‘jaligiga tegishli dala shiyponida elektr hisoblagichsiz, o‘zboshimchalik bilan 47 dona mayning qurilmalari, sovutish va yoritkich moslamalari hamda boshqa elektr qurilmalarini to‘g‘ridan to‘g‘ri elektr tarmog‘iga ulagan holda, noqonuniy foydalanib kelinayotgani aniqlangan hamda mazkur holat bo‘yicha dalolatnoma rasmiylashtirilgan.
Dastlabki qayta hisob-kitoblarga ko‘ra, “Xayrullo-Narzullo” fermer xo‘jaligi tomonidan filial manfaatiga 484,8 ming kilovatt yoki 436,3 million so‘m zarar yetkazilgani aniqlangan.
Mazkur holat yuzasidan prezidentning tegishli qarorlariga asosan noqonuniy foydalanilgan mayning fermalariga nisbatan 5 barobar o‘suvchi koeffitsiyent qo‘llanib, 2,2 milliard so‘m mablag‘ undirishga hujjatlar rasmiylashtirilgan. Huquqbuzarga 5 barobar o‘suvchi koeffitsiyent bilan jarima tariqasida 1,8 milliard so‘m qo‘shimcha hisob-kitob qilingan.
Ayni paytda mazkur holat huquqni muhofaza qilish organlari tomonidan o‘rganilmoqda.
Oktyabr oyida Navoiy viloyatining Karmana tumanida davlatga 24,4 milliard so‘m zarar keltirgan noqonuniy mayning ferma aniqlangandi. Viloyatda iyun oyida 9,6 milliard so‘mlik, iyul oyida esa salkam 1 milliard so‘mlik elektr energiyasidan noqonuniy foydalangan mayning ferma fosh etilgan.
