Las-Vegas universitetida noma’lum shaxs otishma sodir etdi. Qurbonlar bor

Las-Vegasdagi Nevada universiteti kampusida noma’lum shaxs o‘t ochib, bir necha kishini yaraladi, kamida uch kishi halok bo‘lgani ma’lum. Politsiya jinoyatchini o‘lik holda topdi.

Qurbonlarning aniq soni hozircha e’lon qilinmagan. Las-Vegas politsiyasi faqat uch kishining o‘limi haqida xabar berdi. Qancha talaba jarohat olgani ham noaniq. Biroq Las-Vegas politsiyasi sherifi Kevin Makmehillning so‘zlariga ko‘ra, politsiya otishmachini topganida u o‘lik holda bo‘lgan, deb yozadi CNN.

Rasmiy xabarlarda gumonlanuvchining o‘limi sabablari aytilmagan. Shahar bosh sherifi tez orada batafsil intervyu berishga va’da beradi.

Jamoatchilik uchun endi tahdid yo‘q. Gumonlanuvchi vafot etdi. Ayni paytda biz uchta qurbon borligini bilamiz, ammo jarohatlanganlar soni noma’lum. Bu raqam o‘zgarishi mumkin. Batafsilroq ma’lumotga ega bo‘lganimizda sizga xabar beramiz, — dedi sherif Makmehill.

Avvalroq AQSHning Men shtati Lyuiston shahrida 18 kishini o‘ldirganlikda gumon qilingan erkak uch kunlik qidiruvdan so‘ng o‘lik holda topilgandi.