Quyuq tuman sabab O‘zbekistondagi ayrim aeroportlar faoliyati cheklandi
Quyuq tuman sababli O‘zbekistondagi ayrim aeroportlar faoliyati cheklandi. Bu haqda Uzbekistan Airports matbuot xizmati xabar berdi.
Ma’lum qilinishicha, Irkutsk—Farg‘ona yo‘nalishi bo‘yicha reysni amalga oshirayotgan S7 Airlines samolyoti noqulay ob-havo sharoiti tufayli 7-dekabr kuni soat 23:27 da Namangan aeroportidagi muqobil aerodromga qo‘ngan. Samolyotdagi 177 nafar yo‘lovchi Farg‘onaga yerusti transporti orqali yetkazilishi belgilangan.
Biroq 8-dekabr kuni soat 00:10 dan boshlab Namangan aeroportini ham quyuq tuman qoplagani sabab ushbu aeroport ishi ham vaqtincha cheklandi.
Panorama Airways’ning Madina—Namangan yo‘nalishi bo‘yicha uchgan reysi Toshkentdagi muqobil aerodromga qo‘nishga qaror qilgan. Soat 02:33 da bortida 170 nafar yo‘lovchi bo‘lgan samolyot Toshkent aeroportiga qo‘ngan.
Samarqand xalqaro aeroportida ham qalin tuman kuzatilib, samolyotlarni qabul qilish cheklandi. Soat 02:54 da ushbu cheklov olib tashlandi.