Sirdaryoda Turkiya va Meksika orqali AQSHga yuborishni va’da qilgan shaxs ushlandi
Sirdaryo viloyatida noqonuniy yo‘llar bilan AQSHga yuborishni vaʼda qilgan shaxs ushlandi, deb xabar beradi Bosh prokuratura huzuridagi departament.
Ma’lum qilinishicha, departament hamda DXXning Sirdaryo viloyati boshqarmalari tomonidan Yangiyer shahrida tezkor tadbir o‘tkazilgan. Tadbirda Y.A. ismli shaxs (muqaddam sudlangan) tanishi U.P. bilan o‘zaro til biriktirib, fuqaro M.A.ni Qo‘shma Shtatlarga borishi uchun viza hujjatlarini rasmiylashtirib, Turkiya va Meksika davlatlari orqali yuborishi va’da qilgani aniqlangan. Xizmati evaziga U.P. 8,1 ming dollar va 1,2 million so‘mni olgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 168-moddasi (firibgarlik) bilan jinoyat ishi qo‘zg‘atilib, tergov harakatlari o‘tkazilmoqda.
11-sentyabr kuni Samarqandda 14 ming dollar evaziga Samarqand—Istanbul—Madrid—Nikaragua yo‘nalishi bilan AQSHga ishga jo‘natishni vaʼda qilgan shaxs qo‘lga olingani xabar qilingandi. Iyun oyining o‘rtalarida Samarqandda ikki kishini AQSHga yuborish uchun 40 ming dollar olgan shaxs ushlangandi. May oyida esa shunday noqonuniy yo‘llar bilan AQSHga yuborish uchun 30 ming dollar olgan shaxs qo‘lga olingandi.
