Eronda erini o‘ldirgan ayol qatl etildi
Eron hukumati o‘z turmush o‘rtog‘ini o‘ldirganlikda aybdor deb topilgan Samira Sabzian-Fardni qatl qildi. Bu haqda Norvegiyada joylashgan Eron Inson huquqlari tashkilotiga (IHR) tayanib, Iran International xabar berdi.
Xabarga ko‘ra, 15 yoshida turmushga chiqqan Sabzian-Fard 2013-yilda turmush qurganidan to‘rt yil o‘tib erini o‘ldirgani uchun o‘lim jazosiga hukm qilingan. Marhumaning qarindoshlari u oilaviy zo‘ravonlik qurboni bo‘lganini aytmoqda.
IHR direktori Mahmud Amiri-Mog‘addam ayolning qatl etilishini “samarasiz va korrupsiyalashgan hukumat o‘zini saqlab qolish uchun zo‘ravonlik va qo‘rqitishga murojaat qilayotganining yorqin aksi” deb ta’kidladi. IHR xalqaro hamjamiyatni oliy rahbar Ali Xomanaiy va Islom Respublikasining boshqa rasmiylarini bunday harakatlar uchun javobgarlikka tortishga chaqirdi.
Sabzian-Fardning hikoyasi yoshligida turmushga chiqishga majbur bo‘lgan va keyinchalik oilaviy muammolar qurboniga aylangan Eron ayollarining timsoli ekani aytilmoqda. Eron statistik markazining so‘nggi hisoboti qayg‘uli dalillarni ochib beradi: birgina 2022-yilda Eronda 15 yoshgacha bo‘lgan kamida 27 448 nafar qiz turmushga chiqqan.
Shu bilan birga, mamlakatda nikohni rag‘batlantirish siyosati kuchayib bormoqda. Bu haqda Eron oliy rahnamosi Ali Xomanaiy ta’kidlagan. So‘nggi yillarda qizlarning turmush qurish yoshini pasaytirish va oilalarni qizlarining turmushga chiqishiga ko‘maklashish bo‘yicha birgalikdagi sa’y-harakatlar amalga oshirilmoqda.
Har beshinchi nikoh voyaga yetmaganlar bilan tuzilgan, qizlarga 13 yoshdan boshlab turmushga chiqishga ruxsat beriladi. Rejimning sa’y-harakatlari parlamentning ayrim a’zolari, hukumat amaldorlari va turli madaniy-ma’rifiy muassasalar tomonidan qo‘llab-quvvatlandi.
