Isroil HAMASga qarshi harbiy amaliyoti nomini o‘zgartirishni rejalashtirmoqda
Isroil 7-oktyabrdan buyon HAMASga qarshi olib borayotgan “Temir qilichlar” operatsiyasi uchun yangi nom tanlamoqchi. Bu bo‘yicha hukumat komissiyasi kelasi hafta yig‘iladi. Bu haqda Isroil OAV xabar bermoqda.
Komissiyaga taklif qilinadigan nomlar orasida “Ibtido urushi” (Tavrotning birinchi kitobi nomidan), “Simxat Tavrot urushi” (urush boshlangan kundan kelib chiqib), “Tirilayotgan ruh urushi” kabi nomlar bor.
Nomlar bo‘yicha hukumat komissiyasi tarkibiga tabiiy fanlar, tarix, geografiya, arxeologiya, iudaizm, ibroniy, arab tillari bo‘yicha mutaxassislar, shuningdek, Bosh vazir, Mudofaa, Ichki ishlar, Transport vazirliklari, Kartografiya markazi, Yahudiy milliy jamg‘armasi, Tabiatni muhofaza qilish va milliy bog‘lar boshqarmasi vakillari kiradi.
