Eron G‘azoga hujum to‘xtamasa, qanday chora ko‘rishini ochiqladi
Eron G‘azo sektoriga hujum to‘xtamasa, O‘rta Yer dengizini to‘sib qo‘yishini ma’lum qildi. Bu haqda eronlik general, Islom inqilobi qo‘riqchilari korpusi bosh qo‘mondoni Muhammad Rizo Nag‘diyga tayanib, “TASS” xabar berdi.
“Qo‘shma Shtatlar va ittifoqchilarining G‘azo sektoridagi jinoyatlari davom etsa, ular yangi qarshilik kuchlari paydo bo‘lishini va ular uchun hamon foydalanilayotgan suv yo‘llari yopilishini ko‘radi. Kecha Fors ko‘rfazi va Hurmuz bo‘g‘ozi ular uchun dahshatli tush bo‘lgan bo‘lsa, bugun Qizil dengiz va Bob al-Mandeb bo‘g‘ozi, tez orada O‘rta Yer dengizi, Gibraltar va boshqa suv yo‘llarining yopilishini ko‘radi”, — dedi u.
Nag‘diy O‘rta Yer dengizi blokadasi kim tomonidan va qanday tashkil etilishi mumkinligiga aniqlik kiritmadi. Eron va Yamanning “Ansor Alloh” (husiylar) guruhi unga kirish imkoniga ega emaslar.
G‘azo sektorida Falastin-Isroil mojarosi avj olganidan so‘ng, husiylar Isroilga hujumlar uyushtirishi va operatsiya o‘tkazilgunga qadar ular bilan bog‘liq kemalarning Qizil dengiz va Bob al-Mandeb bo‘g‘ozi suvlari orqali o‘tishiga ruxsat bermasliklarini aytdi.
Noyabr oyi o‘rtalaridan beri Qizil dengizdagi bir qancha savdo va harbiy kemalar Yamanning “Ansor Alloh” harakati nazorati ostidagi hududda hujumga uchradi. Bundan tashqari, husiylar bortida 20 dan ortiq ekipaj aʼzosi bo‘lgan Galaxy Leader yuk kemasini qo‘lga oldi.
Husiylarning harakatlariga javoban AQSH rasmiylari xalqaro koalitsiya tuzilgani va Qizil dengizda navigatsiya erkinligini taʼminlash va kemalarni himoya qilish bo‘yicha operatsiya tayyorlanayotganini eʼlon qildi. Operatsiya ishtirokchilari orasida Bahrayn, Buyuk Britaniya, Ispaniya, Italiya, Kanada, Niderlandiya, Norvegiya, Seyshel orollari va Fransiya bo‘lishi kerak.
Shundan keyin Yaman qurolli kuchlari Qizil dengizni amerikaliklar va ularning ittifoqchilari uchun “qabristonga aylantirishini” ta’kidladi.
