Sharl Mishel Yevropa kengashi rahbari lavozimini muddatidan oldin tark etishi mumkin
Yevropa kengashi rahbari Sharl Mishel yozgi Yevropa saylovlarida Belgiya liberallari vakili sifatida ishtirok etish niyatida ekanini aytdi. Bu haqda Deutsche Welle xabar berdi.
“Men 2024-yil iyun oyida Yevroparlamentga saylanishga qaror qildim”, — dedi siyosatchi.
Agar Mishel saylansa, u Yevropa Kengashi rahbari va Yevropa parlamentariysi lavozimini birlashtira olmaydi. Yevroparlamentga saylovlar 6—9-iyun kunlariga belgilangan va Mishelning Yevropa Kengashi rahbari sifatidagi vakolati 2024-yilning noyabrida tugaydi, shu bois u bu o‘rinni erta tark etadigan vaziyat yuzaga kelishi mumkin.
Bu Vengriya bosh vaziri Viktor Orban uchun vaqtinchalik Yevropa Kengashi rahbari lavozimini egallashda potensial imkoniyatni ochadi, chunki Vengriya 2024 yilning iyulidan dekabrigacha Yevroittifoq Kengashiga raislik qilishi kerak. Buning oldini olish uchun Ittifoqqa a’zo davlatlar rahbarlari Mishel o‘rniga nomzod bo‘yicha oldindan kelishib olishlari kerak.
Yevropa Ittifoqi saylovlari
2019-yilda Sharl Mishel Polsha siyosatchisi Donald Tusk o‘rniga Yevropa kengashi raisi lavozimini egalladi.
“Yevropa Ittifoqi kengashi raisi lavozimi Lissabon shartnomasiga muvofiq, taxminan 15 yil avval tashkil etilgan”, — deb eslaydi AFP.
Yevropa Kengashining amaldagi rahbari Yevropa Ittifoqi sammitlarini tayyorlash va o‘tkazish uchun mas’ul bo‘lib, unda 27 davlat va hukumat rahbarlari uchrashadi. Kengash yig‘ilishlari odatda Bryusselda o‘tkaziladi.
Yevropa saylovlarida Yevroparlamentning 720 nafar a’zosi besh yillik muddatga saylanadi. Bu dunyodagi eng yirik transmilliy saylov bo‘lib, unda Yevropa Ittifoqining 27 davlatidan 400 milliondan ortiq saylovchi ishtirok etishi mumkin. Ular o‘tkazilgandan so‘ng Yevropa Ittifoqi boshqaruv organlari – Yevropa Kengashi va Yevropa Komissiyasi rahbarlari almashadi, unga hozir nemis siyosatchisi Ursula fon der Lyayen boshchilik qilmoqda.
