“Urushda pauza bo‘lmaydi, chunki bu faqat Rossiya uchun foydalidir” — Zelenskiy

Ukraina va Rossiya o‘rtasidagi urushda pauza bo‘lmaydi, chunki bu faqat Rossiya Federatsiyasi uchun foydalidir. Bu haqda Ukraina prezidenti Vladimir Zelenskiy Tallinda estoniyalik hamkasbi Alar Karis bilan muzokaralar yakunida ma’lum qildi.

Zelenskiyning ta’kidlashicha, Rossiya bugungi kunda ba’zi turdagi qurollarning yetishmovchiligiga duch kelgan. Pauza paytida ular yana zaxiralarni to‘plab olishi mumkin. Bundan tashqari, pauza kuchlarni qayta to‘plash imkoniyatini ham beradi.

“Bugungi kunda Rossiya qanday hajmda dron va artilleriya snaryadlarini ishlab chiqarayotganini bilamiz. Ularda yetishmovchilik kuzatilmoqda. Shu sababli Rossiya Erondan katta miqdorda dronlar xarid qilmoqda.

Bundan tashqari, Shimoliy Koreyadan milliondan ortiq artilleriya snaryadlarini olishgan”, — dedi Zelenskiy.