Kristin Lagard: “Trampning AQSH prezidenti sifatida qayta saylanishi — Yevropa uchun ochiq tahdid”
AQSH sobiq prezidenti Donald Trampning ehtimoliy qayta saylanishi Yevropaga tahdid soladi. Bu haqda Yevropa Markaziy banki rahbari Kristin Lagard France 2 telekanaliga bergan intervyusida ogohlantirdi.
“Agar tarixdan, ya’ni Tramp o‘z mandatining dastlabki to‘rt yilida olib borgan siyosatidan saboq olmoqchi bo‘lsak, bu aniq tahdid”, — dedi Lagard.
U Trampning savdo tariflari, NATOga sodiqligi va iqlim o‘zgarishiga qarshi kurash bo‘yicha taklif qilgan siyosatini esga olishni taklif qildi.
“Kamida mana shu uchta sohada Amerika manfaatlari o‘tmishda Yevropa manfaatlariga mos kelmagan”, — dedi Yevropa Markaziy banki rahbari.
Shu bilan birga, Lagard Trampning qayta saylanishi AQSHning Ukrainani qo‘llab-quvvatlashiga ta’sir o‘tkazmasligiga ishonishini qo‘shimcha qildi.
“AQSH Kongressida Rossiyaning Ukrainaga qarshi olib borayotgan shafqatsiz urushiga qattiq qarshi bo‘lgan, Ukrainani moliyalash va qo‘llab-quvvatlashda davom etadigan bir qancha aʼzolar bor”, — dedi Lagard.
