Yevropa Ittifoqi davlatlari Qizil dengizga missiya yuborishga kelishib oldi
Yevropa Ittifoqi davlatlari Qizil dengizdagi kemalar xavfsizligini taʼminlash uchun dengiz missiyasini tuzishni maʼqulladi. Bu haqda Reuters agentligi manbalarga tayanib xabar berdi.
Ushbu missiya 19-fevraldan kechiktirmay tuzilishi rejalashtirilgan. U savdo kemalarini husiylarning hujumlaridan himoya qiluvchi boshqa davlatlar bilan hamjihatlikda ishlaydi.
G‘azo sektoridagi mojaro avj olgandan so‘ng husiylar Isroil hududiga hujumlar uyushtirishlarini va Falastindagi operatsiya yakunlanmaguncha, ular bilan bog‘liq kemalarning Qizil dengiz hamda Bab al-Mandeb bo‘g‘ozi suvlari orqali o‘tishiga ruxsat bermasliklarini ma’lum qilishdi.
AQSH Markaziy qo‘mondonligi hisob-kitoblariga ko‘ra, husiylar o‘tgan yilning noyabr oyi o‘rtalaridan beri Qizil dengizda 20 dan ortiq tinch aholi kemalariga hujum qilgan.
Avvalroq AQSH va Buyuk Britaniya harbiylari Yamanning Al-Bayda provinsiyasidagi husiylar pozitsiyalariga yangi havo hujumlarini amalga oshirgani xabar berilgandi.
