O‘zbekiston va Janubiy Koreya o‘rtasida bojxona ishlari bo‘yicha o‘zaro ko‘maklashishga oid bitim tasdiqlandi
“Xalqaro shartnomani tasdiqlash to‘g‘risida”gi prezident qarori qabul qilindi, deb xabar beradi Telegram’dagi “Huquqiy axborot” kanali.
Qarorga ko‘ra, O‘zbekiston va Janubiy Koreya hukumatlari o‘rtasida Bojxona ishlarida o‘zaro ko‘maklashish to‘g‘risidagi bitimga o‘zgartirish kiritish to‘g‘risidagi bayonnoma tasdiqlandi.
Mazkur bayonnoma 2023-yil 22-sentyabr kuni Toshkent shahrida imzolangan.
Iqtisodiyot va moliya vazirligi huzuridagi Bojxona qo‘mitasi ushbu xalqaro shartnomani amalga oshirish uchun masʼul bo‘lgan vakolatli organ etib belgilandi.
Vazirlar Mahkamasi hamda tegishli vazirlik va idoralarning rahbarlari ushbu xalqaro shartnoma kuchga kirgandan keyin O‘zbekistonning majburiyatlari bajarilishi ustidan belgilangan tartibda nazoratni taʼminlaydi.
2023-yilning yanvarida “Xalqaro shartnomani tasdiqlash to‘g‘risida”gi prezident qarori bilan O‘zbekiston va Saudiya Arabistoni podshohligi hukumati o‘rtasida bojxona ishlarida hamkorlik va o‘zaro yordam to‘g‘risidagi bitim tasdiqlangan edi. Fevral oyida esa O‘zbekiston Pokiston bilan imtiyozli savdo sohasida hamkorlik qilishi ma’lum bo‘ldi.
