Rossiyada Putinning do‘stiga qarashli gaz terminaliga dronlar hujum qildi (video)
Rossiyaning Leningrad viloyatida Rossiya prezidenti Vladimir Putinning do‘sti Gennadiy Timchenkoga tegishli “Novatek” kompaniyasining yirik gaz terminali dronlar hujumiga uchrab, yonib ketdi. Bu haqda “Fontanka” xabar berdi.
Jurnalist Denis Kazanskiyga ko‘ra, yong‘in dronning hujumi tufayli boshlangan. Leningrad viloyati gubernatori Aleksandr Drozdenko Ust-Luga portida yong‘in sodir bo‘lgani, xodimlar evakuatsiya qilinganini aytdi, biroq Rossiya rasmiysi hodisa sabablarini oshkor qilmagan.
Mahalliy “Fontanka” nashri esa o‘z manbalariga tayanib, 21-yanvarga o‘tar kechasi, Ust-Lugadagi yong‘indan bir oz oldin Rossiya havo hujumidan mudofaa kuchlari “Sankt-Peterburg tomon uchayotgan ikkita dronni payqagan”ini yozdi.
Nashrning qo‘shimcha qilishicha, shaharga yaqinlashganda dronlar yo‘nalishini o‘zgartirib, Kingisepp tumani tomon uchib, “Novatek” gaz omboriga hujum qilgan.
Shu bilan birga, na viloyat hokimiyati, na Rossiya Mudofaa vazirligi favqulodda holat sabablarini hozircha aytmagan. Qutqaruvchilar Ust-Luga portidagi Novatek terminalida chiqqan yong‘inni qurshab olgan, yong‘in darajasi 2 darajaga tushirilgan.
Aynan Ust-Lugadagi terminal orqali Rossiya 2023-yil dekabr oyida Urals neftining 85 foizini Turkiyaga eksport qilgan. Portlash vaqtida terminal yaqinida boshqa narsalar qatorida turk tankeri ham bo‘lgan.
